ROXAS CITY – Padayon ang information dissemination sang mga opisyales sang Barangay Tanque sining siyudad matapos nga nakapagkit naman sang duha ka panibag-o nga kaso sang COVID-19 sa ila barangay.
Ini ang ginpahayag ni Punong Barangay Herminia Dillo sang mainterview sang Bombo Radyo.
Suno kay Dillo nga ginalakipan ini sang duha ka mga health care workers nga lunsay nagatrabaho sa private ospital kag residente sa isa ka subdivision sang amo nga barangay.
Ginklaro man sang amo nga opisyal nga indi mga katapo sang Barangay Health Emergency Response Team (BHERT) ang mga nagpositibo.
Nag-apelar naman ang nasambit nga punong barangay sa mga pumuluyo partikular na sa mga kabataan nga masami sini makita sa kalsada nga nagahampang kun mahimo likawan anay ang pagguwa subongman sa mga ginikanan mas maayo nga hambalon nila ang ila mga kabataan.
Hugot naman nga ginabantayan sang mga opisyales sang ila barangay ang mga residente subongman padayon ang ginapatigayon nga contact tracing sa mga indibidwal nga nakahalubilo sa mga COVID-19 patient.
