ROXAS CITY – Tuman ang paghinulsol sang duha sa apat ka mga suspetsado nga imbolbado sa kamatayon ni retired Master Sergeant kag Security Officer sang Golden Claw Security Agency nga si Juniffer Borda nga gintiro patay sa Barangay Bolo, Roxas City.
Sa interview sang Bombo Radyo sa self-confessed gunman nga si Garry Onilan gin-ako sini nga panghold-up gid lamang ang una nga plano sang grupo apang sang nahibaluan sini nga isa ka retirado nga katapo sang militar si Borda, ginpakamayo na lamang nila nga patyon ang biktima bangud sa kahadlok nga balikan sila sa ulihi.
Ginpanginwala naman ni Onilan nga miyembro ini sang isa ka gun for hire group bangud ginpanindugan sini nga ini ang labing una nga tinion nga nakapatay ini sang tawo.
Dugang pa sini nga wala ini nag-usar sang droga antes ginhimo ang nasambit nga krimen.
Suno kay Onilan nga si Romulo Briyol ang nag contact sa iya natuhoy sa plano nga paghold-up kay Borda.
Samtang tuman naman ang paghinulsol sang ginatudlo nga master mind sa paghold-up kay Borda.
Ginpanindugan naman ni Rogelio Padernal nga hold-up gid lamang ang plano sang grupo apang ginkakibot sini nga ginpatay ni Onilan ang biktima.
Mahibaluan nga indi sila kilalahay ni Onilan kag si Romulo Briyol ang nagkuha sa iya bilang gunman.
Suno kay Padernal nga ginpartida nila ang nataban nga kwarta sa diin tag P30,000 ang ila partidahay samtang P40,000 naman kay Onilan bangod iya ang motorsiklo kag armas-luthang nga gingamit sang natabo ang insidente.
Aminado si Padernal nga nagagamit ini sang iligal nga droga sang tinalikdan nga tuig apang nag-untat man ini sang damlag lang.
