ROXAS CITY – Pilason ang tatlo ka mga persona matapos ang pagbungguanay sang duha ka mga motorsiklo sa Barangay Jaena Norte, banwa sang Jamindan alas-5:40 sang hapon, Hunyo 26.
Ginkilala ang driver sang Smash 115 kay Junrey Vigo, 29-anyos, residente sang sitio Aranda Barangay Linambasan, sa amu nga banwa.
Samtang ang driver sang raider nga sahi sang motorsiklo amu si Joan Molar, 32-anyos, kag sakay sini nga si Chris John Marib-on, mga residente sang Maasin, Iloilo.
Sandig imbestigasyon sang kapulisan, naagaw sang driver sang raider ang linya sang kasugata nga motorsiklo nga ginamaneho ni Vigo, pag-abot sa kurbadahon nga dalan, rason nga nagkalatumba ang mga ini sa salakyan kag gintunaan sang ila pag-angkon sang kapilasan sa lawas nga natigayon man marespondehan sang rescuers.
Ginpadangat sa Sao District Hospital si Vigo, samtang sa Mambusao District Hospital ginpadangat si Molar kag iya back rider.
Nagapadayon sa karon ang imbestigasyon sang mga kapulisan.
