ROXAS CITY – Nagapadayon ang imbestigasyon sang Roxas City Police Station sa nagluntad nga bun-anay sang duha ka mga persona sa isa ka compound sa Barangay Inzo, Roxas City.
Ginkilala ang duha ka mga pilason nga sanday Mario Calanza, 43 anyos kag Anthony Barbecho, 32 anyos nga lunsay mga residente sang Mandurriao, Iloilo.
Sandig sa inisyal nga imbestigasyon sang mga kapulisan sang Roxas City Police Station, nagainom-inom ang duha ka mga nasambit nga persona kaupod ang iban pa nila nga mga kaupdanan.
Apang sa ulihi, naglisensiya ang ila sini mga kaupdanan nga magatulog na rason nga ang duha na lamang ka mga persona ang nabilin nga nagainom.
Nakibot ang ila mga kaupdanan sang hinali na lamang nga may nagluntad nga kinagamo sa tunga sang duha ka persona sa diin may mga buno na sila sa magkatuhay nga parte sang lawas.
Gilayon naman gindala ang duha sa ospital para sa nagakaigo nga pagbulong.
Samtang, padayon naman nga ginahibalo sang mga kapulisan kun ano ang ginhalinan sang nagluntad nga insidente.
