Patay ang isa ka Capizeño kag Bicolano samtang pilason naman ang pito ka mga Overseas Filipino Worker matapos mahulog sa pil-as ang ginasakyan nga company van sa Riyadh, Saudi Arabia.
Ginkilala ang mga napatay nga sanday Romeo Deondo sang Panit-an, Capiz kag Anthony Fulong sang Bicol matapos makalampos ang ulo sa mga bato kasunod sang pagkahulog sang ila salakyan.
Sa interview sang Bombo Radyo kay Loreto Lucernas sang Pasig City kag isa man sa mga biktima nga antes sila magbiya sa ila gina-ubrahan, kulang na sa hangin ang goma sang salakyan.
Suno sa iya nga samtang ginasubay nila ang dalanon, nadulaan sang kontrol ang pinoy nga driver sa manubela kag nahulog ang salakyan sa nasambit nga pil-as may duha ka metros ang kadalumon.
Gindugang pa sini nga dead on the spot sanday Deondo kag Fulong bagud sa impact sang sila ang magtabog gikan sa salakyan.
Suno pa sa iya nga makaduha ka beses na nga nahulog ang salakyan sa amo man nga pil-as apang wala na makaluwas ang duha ka mga pinoy sa kamatayon.
Nahibaluan gikan sa iya nga duha ka tuig pa lamang nga nagatrabaho ang mga biktima bilang factory worker sa nasambit nga pungsod.
Nagpromesa naman ang ila nga kompanya nga indi sila pagpabay-an kag pagasabton ang tanan nga kagastuhanan kag sa mga napatay.
