ROXAS CITY – Pilason ang duha ka mga driver matapos ang pagbungguanay sang ginamaneho nga motorsiklo sa Sitio Palagtingan, Barangay Agambulong banwa sang Jamindan, alas-7:40 sang gab-i, Hunyo 26.
Ginkilala ang driver sang motorsiklo nga Rusi kay Erlee Gardoce, 18-anyos.
Samtang ang driver sang Honda 125 nga motorsiklo amu si Ryan Bacaisan, 33-anyos residente sang Sitio Malonoy, lunsay sa kapareho nga barangay.
Sandig sa imbestigasyon sang katapo sang Jamindan MPS, nga samtang ginasubay sang magtimbang nga drivers ang amu nga dalan, hinali nga nabungguan ni Bacaisan ang kasugata nga si Gardoce.
Bangud sa aksidente, nagkalatumba ang mga ini sa ila motorsiklo, kag ginpadangat sa Mambusao District Hospital para sa pagbulong.
Wala ginpahayag kun nakainom sang makahulubog nga ilimnon ukon wala, ang duha ka mga drivers.
Nagapadayon ang imbestigasyon sang mga kapulisan angut sa aksidente.
