ROXAS CITY – Kompiskado ang duha ka mga ‘tolilot’ slot machines sa ginpatigayon nga anti-gambling operation sang mga katapo sang Roxas City Police Station sa Barangay Culasi, Roxas City.
Una diri, gin-surrender ni Elvie Delima sang nasambit man nga lugar ang isa ka slot machine nga may unod nga sensilyuhon nga nagalab-ot sa P152 nga ginapahayag ginapanag-iyahan ni Jose Bunda, 55 anyos sang Barangay Baybay, sining siyudad.
Sa paglibot pa sang mga kapulisan, gin-surrender naman ni Antonette Manangat ang isa pa gid ka slot machine nga ginapanag-iyahan naman ni Nonoy Castro sang Barangay Banica nga may unod nga sensilyuhon nga nagalab-ot naman sa P170.
Yara na sa kustodiya sang mga kapulisan ang nasambit nga mga slot machines kag magapangatubang naman ang nasambit nga mga persona sa panumbungon nga paglapas sa Presidential Decree 1602 ukon Anti-Gambling Law.
