ROXAS CITY – Duwa ka mga market vendors ang nakit-an nga nagabaligya sang pork siomai nga posible positibo sa African Swine Fever sa Mambusao Public Market sa banwa sang Mambusao, Capiz.
Una diri nagpadala sang mga laragway ang isa ka concerned citizen sa Bombo Radyo Roxas agud ipakita nga nakabakal ini sang nasambit nga produkto sa amo nga merkado.
Nagduda ini sang nakabati sang balita nga may 11 ka pakete sang frozen siomai nga nakompiskar sang task force sa Iloilo Terminal Market nga ginapatihan positibo sa ASF.
Gilayon naman nga ginpadulungan sang Bombo Radyo News Team ang nasambit nga merkado kag didto nagkompirmar nga ang nasambit nga mga produkto ang gikan sa Antipolo, Rizal nga isa sa mga lugar nga apektado sang ASF.
Suno naman sa wala na ginhingadlan nga market vendor, madugay na siya nga nagabaligya sang amo nga produkto kag wala man ini sang ihibalo natuhoy sa ASF rason nga padayon ini nga nagabakal sa iya ginakuhaan nga manufacturer.
Mahibaluan nga apisar wala sang direkta nga epekto sa tawo ang ASF, ginapaalerto sa gihapon ang publiko bangud posible makaapekto ini sa swine industry.
Mahibaluan nga hugot man sa karon ang ginapatuman nga pagsulundan sa mga pantalan kag pwerto sa Capiz agud malikawan nga makasulod sa probinsiya ang mga pork products gikan sa mga lugar nga apektado sang ASF.
