ROXAS CITY – Nakahunong na karon sa karsel sang Roxas City Police Station ang isa ka 20-anyos nga lalaki matapos nga ginaalegar nagbato sa mga pulis kag naglapas sa ginpatuman nga curfew hours sa probinsya sang Capiz.
Ginkilala ang arestado nga si John Carl Alvarez sang nasambit nga lugar.
Base sa inisyal nga imbestigasyon sang mga kapulisan nga samtang yara nahamtang sa amo nga lugar sanday Police Staff Sergeant Regie Clavaton kag Police Staff Sergeant Danilo Degoma ginapahayag nga sakay sa motorsiklo si Alvarez rason nga gin-usisa ini sang nasambit nga mga pulis kun sa diin ini makadto bangud nagsugod na ang ginpatuman sang curfew.
Apang, sa baylo nga sabton sang ensakto ginapahayag nga nagdaku pa ang tingog ni Alvarez kag kasubong nga ginpahog pa ang mga pulis.
Bangud diri, gilayon naman nga nagtawag sang responde ang mga pulis kag gindala ang nasambit nga persona sa Roxas City Police Station para sa nagakaigo nga disposisyon.
