Patigayunon ang 2026 National Festival of Talents sa Abril 18 tubtob 22, 2026 sa Roxas City, Capiz.
Sa interview sang Bombo Radyo kay Mr. Adonis A. Mosquera, Officer-in-Charge sang Office of the Schools Division Superintendent Roxas City, iya ginpahayag nga magapadulong sa syudad ang mas ukon menos 2,000 ka mga participants halin sa 18 ka mga rehiyon sa pungsod.
Suno kay Mosquera, ang National Festival of Talents isa ka culminating activities sang mga estudyante nga nagatuyo nga ipakita ang mga talento, ikasarang kag abilidad pamaagi sa 16 tanan ka mga nagkalain-lain nga competition.
Pahayag niya, may yara sang 19 ka mga billeting nga napahamtang sa nagkalain-lain nga pampubliko nga buluthuan kag ang lugar sang mga kompetisyon ang napahamtang naman sa mga pribado nga eskwelahan sa syudad.
Nahibaluan nga ang 2026 National Festival of Talents pagatambungan kag pangunahan ni Education Secretary Juan Edgardo ‘Sonny’ Angara. Magatambong man ang mga myembro sang National Management Committee, National Technical Working Group kag iban pa nga mga dinapit nga bisita.
Ginpasalig naman sang natungdan ang mga dumuluong nga maga-enjoy gid sila sa vibe sang syudad kag sa mga pumuluyo.
Interviewed by Bombo Gen Arcosa | via Zona Libre
