ROXAS CITY – Pilason ang 23-anyos nga lalaki matapos mabungguan sang ginamaneho nga motorsiklo ang isa ka tinday nga karabaw sa National Highway, Poblacion Ilaya, banwa sang Cuartero.
Ang wala na ginhingadlan nga biktima ang residente sang Barangay Lacaron, Dao, Capiz.
Sandig sa imbestigasyon sang Cuartero MPS, samtang ginasubay sang biktima ang dalan padulong sa syudad, sang ginapahayag nga nagbusina ang kasugata sini nga salakyan, rason nga ginkakibot ini sang karabaw nga yara sa higad sang karsada kag nagdalagan sa direksyon sang motorsiklo, nga gintunaan sang pagkatumba sang biktima.
Bangud sa natabo, nag-angkon sang pilas sa magkatuhay nga parte sang lawas ang biktima nga madasig naman nga ginpadangat sang Cuartero Emergency Response Unit (CERU) sa Sen. Gerardo M. Roxas Memorial Hospital para sa pagbulong.
Samtang, pilason naman ang nasambit nga karabaw nga gilayon naman nga gin-atipan sang tag-iya.Sa karon, nagapadayun ang imbestigasyon sang Cuartero MPS naangut sa insidente.
