ROXAS CITY – ‘Siya lang ang only one pero lalaki na ang iya ginapangita!’
Ini ang panaysayon sang 26 anyos nga babaye samtang nagahilibion nga mainterview sang Bombo Radyo.
Sa paglibot sang Bombo Radyo News Team, naabtan ang nasambit nga babaye nga ginrespondehan sang mga katapo sang Capiz Emergency Response Team (CERT) sa Roxas City Public Plaza sa Legaspi Street matapos nga nagtuyo magpanginmatay pinaagi sa paglaslas sang iya pulso gamit ang ginbuka nga botelya.
Ginpahayag sang biktima nga madugay na niya nahibaluan nga nagapanglalaki ang iya nga live-in partner nga si James bangud nabatian niya mismo nga may kaupod ini sa isa ka hulot nga ginapa-rentahan sa likod sang Roxas City Hall.
Suno diri nga tuman siya nga nasakitan bangud sa pihak sang iya tuman nga pagpalangga kay James, lalaki na ang ginapangita sini.
Apang gin-ako sang biktima nga ‘silahis’ ang iya nga live-in partner.
Suno naman sa isa ka ginang nga abyan sang biktima, kilala niya si James kag nagpamatuod siya nga wala ini nagapanglalaki.
Ginpahayag sini nga masami gidman nagapahubog ang biktima kag gina-isyuhan si James nga nagapanglalaki.
Mahibaluan nga nagpahubog ang biktima, nagbuka sang botelya kag gingamit ini sa paglaslas sa iya magtimbang nga kamot.
