President Roxas, Capiz— Nadakpan sa ginkasa nga entrapment operation sang mga katapo sang Criminal Investigation and Detection Group (CIDG) Capiz ang 26-anyos nga estudyante matapos ginreklamo sang pagpang-extort sang 21-anyos nga call center agent sa Barangay Poblacion, President Roxas, Capiz kagabi.
Ginkilala ang arestado kay Fermart Fuentes, residente sang Barangay Poblacion sa amo man nga banwa.
Sa exclusive interview sang Bombo Radyo sa tagreklamo nga si alyas Eva, indi sini matuod nga pangalan, nakibot ini sang makabaton sang mensahe nagikan sa facebook user nga “Ako lang sapat na” kag nagasiling nga may yara ini sang ginauyatan nga mga hublas nga largaway kag video sang nasambit nga dalaga.
Ginkatingala ini sang tagreklamo bangud wala man ini sang matandaan nga nagkuha ini sa iya kaugalingon sang laragway nga nakahublas.
Nagpadala pa sang laragway sang iya nagatig-a nga kinatawo ang suspek nga nagapamatuod nga ginatamdan sini ang mga hublas nga laragway ni alyas Eva.
Makapila ini ka beses nga ginbaliwala sang tagreklamo bangud wala ini nagapati, tubtob sang ulihi na disisyonan sini nga i-report sa mga otoridad.
Nagpangayo pa sang P7,000 nga cash si Fuentes sa kondisyon nga indi sini pagpalapta ang laragway kag video sini.
Nagkasa naman sang entrapment operation ang mga katapo sang CIDG Capiz sa pagpanguna ni SPO4 Manuel Gorobat, Jr kag didto ginplano ang pagdakop sa suspek.
Sa ila pagtabuay sa madulom nga porsyon sang barangay Poblacion, nagtabon pa sang panapton sa iya nga nawong ang suspek agud indi makilala sang tagreklamo.
Matapos nakuha sini ang sobre nga naga unod sang kwarta, gilayon ini nga gindakop sang mga otoridad nga nakaplastar na malapit sa lugar nga ila gintabuan.
Nakibot si alyas Eva bangud kakilala sini ang suspek kag isa lang sila ka barangay.
Depensa sang suspek, nabuhat lang sini ang pag blackmail sa ginakabig sini nga kababata kag kabarangay bangud sa nabilin sini nga balayran sa eskwelahan nga kinahanglan niya na nga bayarana.
Gin-ako man sini nga wala sang video ukon hublas nga laragway si alyas Eva nga iya ginauyatan.
Tuman naman sa karun ang paghinulsol ni Fuentes matapos nga madakpan sang mga otoridad.
Sa karun nakahunong na sa karsel sang CIDG ang suspek kag natalana nga pasakaan sang panumbungon nga Robbery Extortion.
