ROXAS CITY – Ginbawian sang kabuhi ang 28-anyos nga lalaki matapos nalukpan sang wala matumod nga sahi sang palupok kadungan sa pagsug-alaw sang bag-ong tuig, Enero 1, 2024.
Ini ang ginkumpirmar ni Mr. Joeffrey Espiritu, Development Management Officer IV sang Department of Health (DOH) Capiz, sang mainterview sang Bombo Radyo.
Suno kay Espiritu, natabo ang insidente sa banwa sang Dao sa diin sandig sa nabaton nga report sang talatapan, yara sa impluwensya sang makahulubog nga ilimnon ang biktima sang ginaalegar gintipon sini ang nagkalain-lain nga pulbura sa lata kag ginpalupok.
Bangud sini, nag-angkon sang pilas sa may iluk ang biktima kag aksidente nga naulamid sa paglupok ang 6-katuig nga bata nga yara nagatindog.
Ginpadangat pa sa ospital ang biktima apang ginbawian ini sang kabuhi samtang ginabulong.
Samtang, gindapatan naman sang pagbulong ang menor de edad kag natigayon nga makaguwa sa ospital.
Kaangut diri, nagsaka na sa 14 ang nabalhag nga kaso sang fireworks related injuries sa probinsya matapos ang pagsug-alaw sang bag-ong tuig.
Kun ikumparar sa kapareho nga timeline sang nakaligad nga tuig nga may 15 ka kaso, nagnubo ini sang 6.67 porsyento.
Sa nasambit nga kaso, 3 ang nagikan sa Dao; 2 sa Mambusao, samtang tig-1 sa Jamindan, Pontevedra, Panay kag Sapian, samtang 5 naman ang sa Roas City.
Sa mga gingamit nga palupok, 4 diri ang nabiktima sang boga; 4 sa kwitis; 2 sa triangle, 1 sa bamboo cannon kag sparkler; samtang 2 ang unknown firecrackers.
