Nakabalhag sang 3 beses nga pagbuga sang abo ang bulkan Kanlaon sa nakaligad nga 24 oras.
Base sa monitoring sang Philippine Institute of Volcanology and Seismology (PHIVOLCS), nagdugay ang ash emissions gikan sa bulkan sang 9 tubtob 23 minuto.
Nagbuga man ini sang aabot sa 4,023 tonelada sang asupre sa sulod sang isa ka adlaw sang tinalikdan nga Domingo, Enero 19.
Naobserbahan man ang 150 metro nga taas sang plume, gikan sa wala untat nga pagsungaw kag pag-abo. Nag-abot man ini sa timog-kanluran nga direksiyon.
Maluwas diri, nakabalhag man sang 13 volcanic earthquake kalakip ang 2 volcanic tremors nga nagdugay sang 9 tubtob 23 minuto.
Nagapabilin naman ang pagmaga sang bulkan.
Kaangut sini, padayon nga ginaabisuhan ang mga residente nga malapit sa bulkan sa Negros Island nga magpabilin nga alerto, ginapanugyanan man ang pag-evacuate sa mga nakasulod sa 6-kilometer radius gikan sa tuktok sang bulkan kag ginadumilian man ang pagpalupad sang mga eroplano sa tuktok sang bulkan bangud sa risgo nga gulpihan nga paglupok sang bulkan, pagbuga sang lava kag iban pa.
