ROXAS CITY — Gindakop sang mga katapo sang Pontevedra PNP ang tatlo ka mga barangay officials sa Barangay Ilaya, Pontevedra, Capiz nga akusado sa kaso nga Grave Coercion may kaangtanan sa maanomalya nga implementasyon sang Emergency Shelter Assistance ukon ESA.
Ginkilala ang mga akusado nga sanday Barangay Kagawad Marilyn Delfin kag Marites Borro kag Day Care Worker nga si Ma. Lyle Cortel.
Gindakop sang kapulisan ang mga akusado sa gahum sang warrant of arrest nga ginpapanaog ni Judge Henry Avelino sang 2nd MCTC, Pontevedra – Panay sa banwa sang Pontevedra, Capiz.
Gilayon man nga nahilway ang mga arestado matapos nga makabayad sila sang piyansa nga tig-P12,000.
Mahibaluan nga ang tatlo kaupod ni anay punong barangay Jonard Bautista nga ginpasakaan sang kaso sa Office of the Ombudsman bangud sa pagpilit sa ila nga maghatag sang kabahin sang ila nabaton nga ESA sa mga barangay officials.
Ginapahayag nga ginhunong pa sadto sang nasambit nga mga barangay officials ang mga tagreklamo sa ila municipal hall kag wala ginpahalin tubtob nga wala sila makahatag sang kabahin sang ila ESA.
Si Bautista ang una na nga ginsipa sa pwesto bilang punong barangay sandig sa desisyon sang Ombudsman matapos nga ini ang napamatud-an nga nakasala man.
