ROXAS CITY-Nagapangayo sang bulig sa lokal nga gobyerno sa banwa sang Mambusao ang 3 ka mga construction workers gikan sa probinsiya sang Antique nga makapauli sa probinsya matapos nga na-stranded sa dulunan sang Capiz kag Aklan sa Barangay Damayan, Sapian.
Sandig sa pagpangusisa sang Bombo Radyo, ang 3 ka mga construction workers ang ginkilala nga sanday Ronilo Ledesma, Dino Ledesma kag Ruel Adolfo, lunsay mga residente sang Barangay Bunga, Mambusao.
Suno kay Ronilo Ledesma nga gikan sila sa probinsiya sang Antique apang ginpakamaayo sang mga ini nga magpauli sa Capiz bangud wala sila sang trabaho kasunod sang Enhanced Community Quarantine (ECQ).
Gindugang pa ni Ledesma nga nakahangop sila nga indi pagpasugtan nga makasulod sa border checkpoint sang ginbalibaran sang mga kapulisan apang ginpakamaayo sa gihapon sang mga ini nga magpabilin sa border kag magpangayo sang bulig sa talapatan sang alkalde sang Mambusao.
Samtang ginkumpirmar man ni Ledesma nga nagpadala na sang mga relief goods sang lokal nga gobyerno sang nasambit nga banwa para sa ila.
Sa karun, ang tricycle nga ila ginsakyan gikan sa probinsiya sang Antique ang nagaserbi nila nga tululogan.
