Madinalag-on nga nadakop sang Police Regional Office 6, ang 3 ka mga ginakabig Most Wanted Person sa Western Visayas pinaagi sa ginpatigayon nga asud-asud nga police operation.
Mahibaluan una nga nadakpan sang kapulisan ang Top 3 Most Wanted Person sa Rehiyon sa Barangay Taculing, Bacolod City, ang suspek nga ginkilala kay alyas Nito, 51-anyos kag residente sang Barangay Beri, Barbaza, Antique.
Kaso nga rape by sexual assault ang ginapangatubang sang suspek.
Sa isa pa ka operasyon natigayon naman nga madakpan ang ginapahayag Top 9 Most Wanted Person sa Barangay Funda-Dalipe, San Jose, Antique nga ginkilala kay alyas Grik, 33 anyos, residente sang Barangay Funda-Dalipe, San Jose, Antique kag may kaso nga rape.
Samtang, arestado naman sang mga otoridad ang ginakabig Top 7 Most Wanted Person sa Barangay Poblacion, Jamindan, Capiz ang suspek nga ginkilala kay alyas Son, 40 anyos, residente sang Pangabuan, Jamindan, Capiz kag may kaso nga statutory rape kag wala sang may ginrekomendar nga piyansa ang korte para sa temporaryo sini nga kahilwayan.
Sa karon nagapabilin na ang mga akusado sa paghinakop sang mga otoridad para sa nagakaigo nga disposisyon.
