PANAY CAPIZ – Dakop sa akto ang tatlo ka mga indibidwal nga nagapatigayon sang illegal nga pagpangisda sa kadagatan nga bahin sang Panay, Capiz.
Ginkilala ang mga nagkaladakpan nga sanday Randy Dela Cruz, Boat Captain, 36-anyos kag mga crew sini nga sanday Jose Nahipos, 36-anyos, Manuel Botictic, 36-anyos lunsay mga residente sang Barangay Casanayan, Pilar, Capiz.
Sa impormasyon nga nakuha sang Bombo Radyo nagikan sa Panay Municipal Police Station, ginpahayag nga nagapatigayon ang mga ini sang (“TRAWL”) nga wala sang nagakaigo nga permit.
Nakuha sa posesyon sang mga ini ang (1) unit pump boat nga nagabalor P100,000.00, (1) unit Trio Diesel Engine nagabalor P30,000.00, lambat nga nagabalor P200,000.00 kag mas o menus (25) kilos sang nagakalain-lain nga mga isda nga may market value of P5,000.00.
Kaso nga paglapas sa Municipal Ordinance No. 03-02, Series of 2003, ang paga-atubangon sang mga nagkaladakpan.
Sa karun, nagapabilin ang mga ini sa kustodiya sang MENRO-LGU Panay subong man ang mga kagamitan nga nakuha para sa nagakaigo nga disposisyon.
