ROXAS CITY – Magapangatubang sang panumbungon nga paglapas sa RA 9165 ukon Comprehensive Dangerous Drugs Act of 2002 ang tatlo ka mga suspetsado matapos nga dakpan sa ginkasa nga drug buybust operation sa Block 14, Jumaguicjic Ville, Barangay Jumaguicjic, Roxas City.
Matandaan nga ginkilala ang mga nadakpan nga sanday Nemecio Lagayada, 45 anyos, sang nasambit nga lugar Kirtneill Recibe, 25-anyos kag Micheal Abilibit, 35 anyos, truck driver sang Barangay Punta Tabuc, Roxas City.
Suno kay Police Lieutenant Mark Anthony Garcia, ang team leader sang Provincial Drug Enforcement Unit (PDEU) nga nangin matunog ang pangalan ni Lagayada rason nga ginpaidalom ini sa monitoring sa sulod sang pila ka semana.
Bangud diri, madinalag-on nga nadakpan sang mga kapulisan kahapon nga adlaw si Lagayada kaupod ang duha ka mga suspetsado.
Narekober naman sa posisyon sang mga suspek ang apat ka sachets sang ginapatihan nga shabu, kalibre .45 nga armas luthang nga may mga bala, kag mga drug paraphernalia.
Ginabulubanta nga nagalab-ot sa P700,000 ang balor sang ginapatihan nga illegal nga droga ang narekober sa mga suspek.// Sa karon nakahunong nasa karsel sang Roxas City PNP ang mga suspek.
