IVISAN CAPIZ – Kahadlok ang ginbilin sa tatlo ka mga kabataan, matapos ginaalegar ginpundohan sang itom nga van sa Sitio Magulayag, Barangay Cabugao, Ivisan Capiz.
Sa impormasyon nga nakuha sang Bombo News Team sa lugar, ginapahayag nga samtang nagahampang sanday alyas Toto 8 ka tuig, alyas Nene 12-anyos kag alyas Inday 9 ka tuig malapit sa Daycare center sang may nagpondo nga itom nga van kag ginaalegar nagpanaog ang duha ka mga kababainhan nga lunsay may mga takop ang nawong kag mata lamang ang makita.
Suno sa mga kabataan nga sang nakita nila ang mga ini wala na sila nagduha-duha pa kag nagdalagan pauli sa ila mga puluy-an.
Mahibaluan nga sang natabo ini takna alas 12:00-1:00 sang hapon sadtong Agusto 17, 2024 Sabado nga adlaw.
Bangud sini, matapos makalab-ot sa talatapan sang ila barangay gilayon ini nga ginreport sa Ivisan Municipal Police Station agud hatagan sang maid-id nga imbestigayon kun bala ini matuod nga alegasyon.
Mahibaluan nga sa Sitio Ilaya sa amu man nga barangay may natabo nga kaangay sini nga sitwasyon kun sa diin may ginaalegar nagpanaog sa motorsiklo nga babaye nga magahatag kun tani sang biscuit sa bata nga yara sa higad sang dalan apang, maswerte lamang nga nakadalagan ini papauli sa ila.
Sa karun, padayon pa nga nagatipon kag imbestiga ang katapo sang Ivisan Municipal Police Station sa pagpakig-angut sang mga barangay officials sang Cabugao subong man mga residente pinaagi sa pagtsekyar sa mga Closed-circuit television (CCTV) sa lugar agud matul-id ang matuod nga hitabo.
