ROXAS CITY -Gindakup sa separado nga entrapment operation sang mga kapulisan ang 3 ka mga persona nga ginapahayag imbulbado sa nagakahinabo nga kinawatay sang mga motorsiklo sa probinsiya sang Capiz.
Nadakpan sa ginkasa nga entrapment operation sang gintingub nga pwersa sang Highway Patrol Group (HPG) Capiz, Pontevedra Municipal Police Station kag Panay Municipal Police Station sa Barangay Ilaya, Pontevedra, Capiz ang suspek nga si Alexander Martinez, 24-anyos residente sang Malipayon Village, Barangay Tiza, Roxas City.
Suno sa kay Police Captain Marvin Balmes, hepe sang Panay Municipal Police Station nga ginkasa ang nasambit nga operasyon batuk kay Martinez matapos nga nagpakig-angut sa ila ang pamilya ni Justine Brillo nga gin post sa isa ka buy and sell page ang iya ginbarter nga motorisklo.
Gintransakyon sang mga kapulisan si Martinez kag nagkasugot nga magkitaay sa banwa sang Pontevedra.
Suno pa kay Balmes nga ang ginsakyan sang suspek amo ang motorsiklo ni Brillo.
Apang sang tion nga ginpangitaan sang nakaigo nga papeles si Martinez, wala ini sang may mapakita, rason nga gin-aresto ini sang mga kapulisan.
Kalakip sa mga narekober sang mga kapulisan gikan kay Martinez ang isa ka motorsiklo nga ginapayahag ginkawat sa isa ka establisyemento sa siyudad sang tinalikdan nga mga binulan.
Samtang arestado man sa ginkasa nga entrapment operation ang duha ka wala pa matumod nga mga persona sang mga katapo sang Roxas City Police Station sa Barangay Sibaguan, sining siyudad.
Positibo naman nga gintudlo sang mga himata ni Brillo nga sila ang naka-transaksyon sang natabo nga barteranay sang motorsiklo.
Sa karun padayon pa nga ginahibalo sang kapulisan ang ginpahayag ginataguan sang mga ginkawat nga mga motorsiklo sa probinsiya.
