ROXAS CITY – Leaderless sa karon ang Sangay ng Partido sa Platoon East-Kilusang Rehiyon Panay ukon mas kilala nga Nonito Aguirre Sr. Command Eastern Front Panay matapos ginkumpirma sang pamunuan sang 61st Infantry Hunter Battalion sang Philippine Army nga ang tatlo ka mga napatay sa nagluntad nga enkwentro sa Sitio Tigpaka Daku, Barangay San Antonio, Cuartero, Capiz sang damlag lang ang lunsay mga lideres sang sang hublag.
Sa exclusive interview sang Bombo Radyo Roxas kay Lt. Col. Sisenando Magbalot Jr. battalion commander sang 61st IB, ginpahayag sini nga ang tatlo ka mga nagkalamatay nga ginkilala nga sanday Federico Diaz alyas Ka Val ukon Bontoy, Allan Lerona ukon Felizardo Cerilo kag Remy Beraye alyas Ka Remy ang lunsat may mataas nga posisyon sa hublag.
Ginakabig nga ikaduha nga lider sang Sangay ng Partido sa Platoon East si Diaz ukon alyas Ka Val sang Mahabang Sapa, Cuartero, Capiz sa diin ini ang ginasaligan ni Romulo Gangoso alyas Kumander Reagan sa pagpatigayon sang mga aktibidad sang grupo.
Nagaserbe naman nga finance kag logistic officer sang SPP East si Allan Lerona ukon kilala rin kay Felizardo Cerilo sang Barangay Pinay, Mambusao, Capiz samtang si Remy Beraye ang propaganda activist.
Kalakip sa mga narekober sa encounter site nga karon ang yara sa kostodiya sang militar amo ang duha ka laptop, cellphones, M16 armalite rifle, AK47, .45 caliber pistol samtang ang mga bala kag granada ang yara sa kostodiya sang PNP.
Pila ka mga subersibo nga mga dokumento ang narekober sa lugar, kag ang sobre nga may pangalan sang pila ka mga kilala nga indibidwal.
Sa karon suno kay lt. Col. Magbalot nga nagapatigayon na lamang sang security operation ang militar sa lugar kag ginapasanyog pa ang integration program sang gobyerno.
