ROXAS CITY – Pilason ang tatlo ka mga persona matapos bumunggo sa center island ang ila ginasakyan nga motorsiklo sa Pueblo de Panay, Barangay Lawaan, Roxas City.
Ginkilala ang mga biktima nga sanday Alvin Amata, 18 anyos, driver sang motorsiklo kag duha sini ka mga backriders nga sanday Leo Amata, 21 anyos kag John Baedo, 18 anyos, lunsay mga residente sang Barangay Dinginan, Roxas City.
Base sa inisyal nga impormasyon nga nakuha sang Bombo Radyo, padulong kuntani sa city proper ang tatlo apang nadulaan sang kontrol sa manubela si Amata rason nga bumunggo ang motorsiklo sa center island.
Bangud diri natumba ang motorsiklo sa dalan kag nag-angkon sang magkatuhay nga mga kasamaran sa lawas ang tatlo.
Gilayon nga gindapatan sang pagbulong sang Capiz Emergency Response Team (CERT) ang tatlo kag gindala sa Roxas Memorial Provincial Hospital.
