ROXAS CITY – Arestado ang 34-anyos nga lalaki matapos nga ginaalegar nagpangtutok sang armas luthang kag nagpanguha sang cellphone sa Philippine Railway Street, Barangay 9, Roxas City.
Base sa inisyal nga imbestigasyon sang Roxas City PNP nga samtang nagapungko sa isa ka computer shop ang biktima nga si Floro Gadiano 20-anyos sang nasambit nga lugar sang hinali na lamang ini nga gintutukan sang armas luthang sang suspek nga si Jeffrey Daria 34-anyos sang amo man nga lugar kag ginkuha ang cellphone sang biktima.
Bangud diri, gilayon nga nagpangayo sang responde si Gadiano sa mga pulis kag didto natigayon nga nadakpan ang suspek.
Apang, sang nadakpan na ini sang mga pulis didto kag gintuad sang suspek nga ang ginkuha sini nga cellphone ang ginhatag kay Michael Vincent Buenavista.
Gilayon naman nga ginpadulongan sang mga pulis kag gin-usisa si Buenavista kag ginturn-over naman sa mga otoridad ang cellphone sang biktima.
Samtang, natalana naman nga pasakaan sang panumbungon nga paglapas sa Republic Act 10591 ukon Comprehensive Law on Firearms and Ammunition si Daria.
