ROXAS CITY – Arestado ang 35-anyos nga babayi matapos nadakpan sa akto nga nagapatigayon sang iligal nga pataya ukon “STL Bookies” sa Malipayon Village, Barangay Tiza, sini nga syudad.
Ginkilala ang arestado kay Marvie Dequiña, residente sang Barangay Milibili, Roxas City.
Nadakpan sa akto ang suspek nga nagabaton sang bayad sa ginapataya pinaagi sa pulis nga nagserbe bilang “poseur bettor”.
Nakuha sa posesyon ni Dequiña ang 1 ka pad sang unofficial STL Cotejo, isa ka black ballpen, 1 ka notebook nga may number combination, kag P493 sa nagkalain-lain nga denominasyon.
Magapangatubang ang suspek sa kaso nga paglapas sa PD 1602 sang RA 9287 ukon “An Act Increasing The Penalties For Illegal Numbers Games & Its Implementing Rules”.
Sa karon yara na ini sa kustodiya sang Roxas Component City Police Station para sa nagakaigo nga disposisyon.
