ROXAS CITY, CAPIZ – Nagdangat na sa 355 ka mga kandidato sa 2025 National kag Local Midterm Elections ang naka-file sang ila Statements of Contributions and Expenditures (SOCE) sa talatapan sang Commission on Elections (Comelec) sa probinsya.
Sa interview sang Bombo Radyo kay Atty. Salud Milagros Villanueva, Provincial Election Supervisor, iya ginpahayag nga obligado gihapon ang tanan nga kandidato — daog man ukon pierdi — nga magpasa sang SOCE.
Suno kay Villanueva nga may 16 ka mga kandidato ang wala pa nakapasa sang SOCE.
Nahibaluan nga sang Hunyo 11 ang deadline sang pagpasa sang SOCE kadungan sang opisyal nga pagtakop sang election period.
Ginpahayag sang Comelec nga indi na paghatagan pa sang extension ang amo nga deadline.
Base sa regulasyon sang Comelec, ang mga kandidato nga mapaslawan sa pagpasa sang SOCE posible nga atubangon ang kaso nga administratibo kag para naman sa mga kandidato nga nagdaog, indi sila pagpasugtan nga makapungko sa pwesto bisan pa nakasumpa na sila sa serbisyo.
Ang SOCE amo ang dokumento nga nagadetalye sang tanan nga campaign contributions nga nabaton sang kandidato kag ang gin-gasto sini sa kampanya sang eleksyon.
