ROXAS CITY – Yara sa 365 ka mga barangay kag naglab-ot naman sa 127,473 ka mga pamilya ukon 488,603 ka mga indibidwal ang apektado sang pagbaha sa probinsya sang Capiz, ini ang base sa pinakaulihi nga report sang Provincial Disaster Risk Reduction and Management Office (PDRRMO).
Sa interview sang Bombo Radyo kay Mrs. Judy Grace Pelaez, ginpahayag sini nga naglab-ot naman sa 52,382 ka mga pamilya ukon 215,390 ka mga indibidwal ang nag-evacuate sa nagkalain-lain nga mga evacuation centers sa probinsya.
Dugang pa sini, base sa ila monitoring may yara pa sang mga evacuees nga nagapabilin sa pila ka mga evacuation center ini ang sa Brgy. Dacuton, Codingle, Pob. Ilawod sa banwa sang Dumarao kun sa diin nagalab-ot pa sa 138 ang kabug-usan.
Pag-abot naman sa kahalitan sa agrikultura, ang inisyal nga report gikan sa opisina sang Provincial Agriculturist naglab-ot sa P176 milyon kag ginalauman pa nga magataas pa ang total damages.
Sa Bureau of Fisheries (BFAR), sa inisyal nga report may yara sang kapin P500 milyon nga kahalitan kag sa Imprastraktura may yara sang inisyal report nga nagalab-ot sa P59,626,450 ang kahalitan.
Mahibaluan nga naglab-ot naman sa 19 ka indibidwal ang ginbawian sang kabuhi kag 1 pa ang nagapabilin nga missing.
Nagalaom man ang PDRRMO head nga maaprubahan na ang request nga ipaidalom sa state of calamity ang probinsya agud madamo na sang bulig nga maga-abot gikan sa iban nga ahensya para ipanghatag man sa kada LGUs kag matagtagan sang ayuda ang mga pumuluyo nga apektado sang pagbaha tuga sang Bagyong Agaton.
