ROXAS CITY – Nakahunong na sa karsel sang Roxas City Police Station ang apat ka mga violators matapos nga nadakpan sa akto nga nagainom sa isa ka bukas nga tiangge sa Barangay Baybay, Roxas City.
Ginkilala ang nasambit nga mga persona nga sanday Teudy Gallaza, 51-anyos tumandok sang Pandacan Manila; Hazel Rose Delino, 22-anyos sang Maayon kag Rocel Candido, 27-anyos sang Barangay Enseñagan, Panitan, Capiz apang temporaryo nga nagapuyo ang mga ini sa Don Condrado, Barangay Baybay sining siyudad
Kalakip man sa mga nadakpan ang tindera/tag-iya sang tiangge nga si Shiela Delay, 36-anyos sang nasambit nga barangay.
Nahibaluan nga samtang nagapatigayon sang roving ang mga otoridad nadakpan sa akto nga nagainom ang tatlo sa isa ka bukas nga tiangge samtang hugot nga ginapatuman ang curfew hours kag liquor ban sa probinsya sang Capiz.
Bangud diri, gilayon nga gindala sang mga otoridad ang apat ka nasambit nga mga persona sa Roxas City Police Station para sa nagakaigo nga disposisyon.
Matandaan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
