ROXAS CITY – Nag-angkon sang menor nga mga kasamaran sa lawas ang apat ka mga persona sa pagbungguanay sang duha ka mga motorsiklo sa Barangay Poblacion, Dumalag, Capiz.
Ginkilala ang mga napilasan nga sanday Immaculada Dumagpi, 18 anyos, driver sang motorsiklo; backrider sini nga si Nelrose Delos Reyes, 21 anyos, lunsay mga residente sang Barangay Sto. Angel, sang nasambit man nga banwa; Mike Rivera, 20 anyos, driver sang isa pa ka motorsiklo; kag backrider sini nga si Ariel Layan, 20 anyos sang Barangay Cala-agus, Mambusao.
Base sa inisyal nga imbestigasyon sang Dumalag Municipal Police Station, nadulaan sang kontrol sa iya manubela si Rivera rason nga nabungguan sini ang kasugata nga motorsiklo nga ginamaneho ni Dumagpi.
Bangud diri, lunsay natumba sa dalan ang duha ka motorsiklo kag nag-angkon sang mga kasamaran ang nasambit nga mga indibidwal.
Gilayon naman nga ginpadapatan sang nagakaigo nga pagbulong ang nasambitan nga mga indibidwal.
