ROXAS CITY – Nagparekord sa Roxas City Police Station ang isa ka 46-anyos nga negosyante matapos nga ginaalegar nga tuyo kuntani kastiguhon sa Teodoro Arcenas Trade Center (TATC) sa Barangay 8, Roxas City.
Ginkilala ang tagreklamo nga si Leoncio Gaborne Jr., 46-anyos sang Barangay Banica sining siyudad.
Base sa inisyal nga imbestigasyon sang Roxas City PNP nga samtang yara sa iya baligyaan ang nasambit nga tagreklamo hinali na lamang nga nagpasinsilyo ang suspek nga si Jayson Arro sang iya nga kwarta nga P1,000 sa tiayon sang tagreklamo kag samtang nagahulat ini sang iya nga sinsilyo hinali na lamang nga ginhambalan ni Leoncio nga mag-obserbar sang ginapatuman nga social distancing kasunod sang COVID19 pandemic.
Nag-angkon sang indi pag-intiendihanay ang magtimbang nga bahin rason nga tuyo pa kuntani kastiguhon nanday Jayson kag Felipe Arro alyas Nonoy ang amo nga tagreklamo.
Ginpahayag naman sang tagreklamo nga wala man ini sang malain nga intensyon kay Jason.
Bangud diri, ginpakamaayo na lamang ni Leoncio nga iparekord sa pulisya ang insidente.
