ROXAS CITY – Natalana nga dal-on subong nga adlaw sa Iloilo District Jail sa Pototan, Iloilo ang nagsungka nga mga heinous crime convicts sa probinsiya sang Capiz nga napahilway pinaagi sa Good Conduct Time Allowance (GCTA) Law.
Ini ang ginpahayag ni Capiz Police Provincial Office spokesperson Police Executive Master Sergeant Donna Asmod sa interview sang Bombo Radyo Roxas.
Suno kay Asmod, pagadal-on na subong nga adlaw, Setyembre 20 sa nasambit nga lugar ang mga heinous crimes convicts kasunod sang deadline nga ginpahatag ni Presidente Rodrigo Duterte sa mga heinous crime convicts na napahilway pinaagi sa GCTA.
Ginpahayag ni Asmod nga base sa ila datos, may yara sang 13 ka mga heinous crimes convicts sa Capiz nga napahilway pinaagi sa GCTA apang lima lamang sa mga ini ang boluntaryo nga nagsungka.
Duha ka mga heinous crimes convicts ang nagsungka sa Dumarao PNP kag tag-isa naman sa Sapian, Tapaz kag Jamindan PNP.
