Gin-athag sang Jamindan Muncipal Police Station nga ginaalegar lima ka mga persona ang nagpuli sa pagpang-luthang kag labo-patay sa isa ka lalaki sa Sitio Proper, Barangay Pasol-o, Jamindan, Capiz.
Matandaan nga ginkilala ang biktima kay alyas “Henry”, 56-anyos, samtang ang ginatudlo naman nga mga suspek ang ginkilala nga sanday alyas “Jun”, “Toto”, “Dodoy”, “Nonoy” kag alyas “Jolan”, nga lunsay mga residente sang nasambit nga lugar.
Sa interview sang Bombo Radyo kay PMAJ Jhon Almarino Bonior, hepe sang Jamindan PNP, ginpahayag sini nga ginaalegar nga yara sa lima ka mga persona ang nagpuli luthang kag labo kay Henry.
Dugang pa sini, naglabay sa balay sang mga suspetsado ang biktima kag may nagluntad nga pagbinaisay sa tunga sang magtimbang nga bahin nga yara sa impluwensya sang makahulubog nga ilimnon.
Matapos sang pagbinaisay, liwat nga nagbalik ang biktima nga may bitbit nga binangon sa lugar sang mga suspetsado kag didto na nga natigayon ang pagpatay sa biktima.
Madasig naman nga nakapalagyo ang mga suspetsado matapos nakumiter ang nasambit nga krimen.
Sa karon, nagapabilin sa isa ka punerarya, ang bangkay sang biktima kag desidido naman nga magpasaka sang kaso ang pamilya sini sa ti-on nga madakpan na ang mga suspetsado. Sa karon, nagapatigayon na sang hot pursuit operation ang kapulisan sang Jamindan MPS kag nagapadayon pa ang maid-id nga imbestigasyon sang mga ini angut sa nasambit nga insidente.
