MAMBUSAO, CAPIZ – Patay ang 50-anyos nga amay matapos gintiro sang wala pa makilan-an nga suspek samtang nagakatulog sa ila balay sa Sitio Nabungan, Barangay Maralag, Mambusao, Capiz.
Ginkilala ang biktima nga si Esmael Graciadas Bastian nga residente sang nasambit nga lugar.
Suno kay PCapt. Shaney P. Allanic, Hepe sang Mambusao Municipal Police Station, natabo ang pagpangluthang samtang nagakatulog ang biktima sa kwarto alas 10:00 kagab-i Hulyo 24. Ginapahayag nga sa nasambit nga oras nagahampang sang cellphone ang 15-anyos sini nga bata nga babayi kag nakabati ini sang lagabong sa atop sang ila balay apang wala ini ginsapak sang nasambitan nga bata bangud abi sini may naghaboy lang sang bato sa ila atop.
Apang sang naghana na nga magtulog ang amo nga bata alas 12:10 sang kaagahon, natalupangdan na lamang sini nga madamo na sang dugo ang ginahigdaan sang iya amay kag wala na sang kabuhi.
Nag-angkon sang pilas sa tuo nga dulunggan ang biktima nga naglapos sa iya nawala nga guya kag butkon.
Posible suno kay PCapt. Allanic nga isa ka revolver ang gingamit sa pagpangluthang bangud wala sang may nakit an nga slug or cartridge.
Dugang pa sini nga masami nagapanghangkat sang inaway kun mahubog ang biktima kag posible suno diri nga may naakig sa iya.
Sa karon padayon pa nga ginapadalman sang kapulisan ang imbestigasyon agud matumod ang suspek sa nasambit nga insidente.
