ROXAS CITY – Nag-angkon sang kapilasan sa ulo kag magkatuhay nga parte sang lawas ang isa ka persona matapos nga aksidente bumunggo ang ginamaneho nga motorsiklo sini sa isa ka pampubliko nga salakyan sa Brgy. Bolo sining syudad.
Ginkilala ang biktima kay Edmund Manalo Delfin, 51- anyos, residente sang Brgy. Capagao, Panit-an Capiz kag driver sang motorsiklo nga Yamaha.
Samtang ang suspek ang ginkilala kay Renante Borda Teodosio, 43- anyos, residente sang Brgy. Conciencia, Panit-an, Capiz kag isa ka jeepney driver.
Sa impormasyon nga nakuha sang Bombo Radyo sa Roxas City PNP, ginpahayag nga samtang ginasubay sang jeep ang karsadahon gikan sa Roxas City proper padulong sa Brgy. Lanot, hinali nalang ini nag-U-turn rason nga bumunggo ang nagasunod nga motorsiklo sa nawala nga bahin sang ginapungkuan sang jeepney driver.
Bangud diri, natumba ang motorsiklo kun sa diin nag-angkon sang kapilasan sa ulo kag magkatuhay nga parte sang lawas ang driver samtang masuwerte naman nga wala na pilasan ang driver sang jeepney.
Madasig naman nga ginrespondehan ang biktima sang Capiz Emergency Response Team (CERT), kag gindala sa Capiz Doctors Hospital.
Yara na sa kustodiya sang kapulisan ang suspetsado amu man ang duwa ka salakyan para sa nagakaigo nga disposisyon.
