ROXAS CITY – Magapangatubang sang panumbungon nga Rape in relation to RA 7610 ukon “Special Protection of Children against Abuse, Exploitation and Discrimination Act” ang 54-anyos nga lalaki matapos nga gintaban sini ang 15-anyos nga babayi, nga taga-banwa sang President Roxas.
Ginkilala ang suspek kay Randolph Pedregosa, nga ginapahayag taga Dueñas, Iloilo.
Sa interview sang Bombo Radyo kay PMaj. Alfred De Leon, hepe sang President Roxas MPS, suno diri nga sang nagligad nga semana nagpalapit ang Iloy sang 15-anyos nga si ‘Bebe’ nga wala makapauli ang dalagita sa ila balay, matapos nga naglaong nga maga-eskwela.
Bangud sa tuman nga kabalaka kag para sa madasig nga pagtukib sa ginahamtangan sang iya bata, gin-post ini sa social media kag diri man sa Bombo Radyo, ang amu nga panawagan.
Tubtob nga ginpahayag nabasahan sang nakakilala sa suspek ang amu nga panawagan, rason nga gin-turnover sini ang dalagita sa barangay hall sang Brgy. Bugtongan, Dueñas, Iloilo, nga amu man ang pagkoordinar sang mga Brgy. Officials sa Dueñas MPS, kag natigayon nga maka-coordinate sa President Roxas MPS.
Sa pagpangusisa sang mga katapo sang Women and Children Protection Desk (WCPD) sang President Roxas MPS, sa nasambit nga dalagita, gin-aku sini nga may relasyon sila sang suspek nga kapin 1 na katuig pinaagi sa social media nga Facebook.
Ginsaysay man sini nga ‘nag-meet up’ sila sang lalaki sa syudad sang Roxas kag ginlagaw antes gindala sa Dueñas, Iloilo, rason nga wala ini makapauli sang kapin apat ka adlaw.
Gin-aku man sang dalagita nga may natabo na sa ila sang lalaki.
Nahibaluan nga matapos nga ma-turnover sang kakilala sang suspek ang amu nga dalagita, madasig nga nadula si Pedregosa, kag padayon sa karon nga ginaayam sang mga kapulisan, samtang ginapreparar na ang mga dokumento agud mapasakaan sang nagakaigo nga kaso pinaagi sa regular filing.
Sa dugang nga impormasyon sang suspek, ginpahayag nga bulag ini sa iya asawa kag indi residente sang Brgy. Bugtongan.
Samtang, yara naman sa karon ang dalagita sa paghinakop sang iya ginikanan diri sa Capiz.
