ROXAS CITY – Padayon sa karon ang panawagan sang Bureau of Fire Protection (BFP) Capiz sa publiko nga mangin responsable agud makalikaw sa sunog.
Ini ang ginpahayag ni SFO3 Marlon Garbo, Provincial Chief Operation kag pinuno sang Investigation and Intelligence Section sang BFP-Capiz sang mainterview sang Bombo Radyo.
Kasunod ini sang asud-asod nga pagluntad sang sunog sa magkatuhay nga mga kabanwahanan sa probinsiya kag sa siyudad sang Roxas.
Suno kay Garbo, humalin sadtong Enero tubtob sini nga bulan sang Mayo, 2020, nakarekord na sang 57 tanan ka mga insidente sang sunog sa bilog nga probinsiya.
Sa nasambit nga numero, 35 diri ang grass fire incidents; 15 ang structural kag residential; 3 ang vehicular fire incidents; kag 4 ang post fire incidents nga na-respondehan sang mga bombero.
Narekord diri ang kabug-usan nga 1.8 milyones pesos nga kahalitan.
Kun ikomparar sa nakaligad nga tuig sa kapareho nga period, mas manubo ang napagkit subong nga tuig 2020.
Bangud sa asud-asod nga insidente sang sunog, nagpangabay si Garbo sa publiko nga mangin responsable sa ila mga appliances, dalapugan, kag indi magmatu-mato sang kaayo sang linya sang ila kuryente bangud ini ang masami nga ginatunaan sang sunog.
