ROXAS CITY – Arestado ang anom tanan ka mga persona pinaagi sa entrapment operation sang NBI-Capiz sang damlag sa isa ka hotel sa Pueblo De Panay, Roxas City.
Sa inisyal nga impormasyon nga nakuha sang Bombo Radyo, ginkilala ang mga nagkaladakpan nga sanday Neresa Doromal Nobleza, Rene Gelisanga Nobleza, Andy Halili Antivola, Nancy Biare Ricaforte, Andres Agrasada kag Dexter Pari-an Genon.
Apat sa nasambit nga nagkaladakpan ang mga residente sang Bacolod City kag duha nga taga-Capiz.
Sa interview sang Bombo Radyo kay NBI-Capiz Agent John Katipunan, nakabaton ang ila talatapan sang isa ka sulat nagikan sa isa ka Capizeño nga yara sa Bacolod kun sa diin nagpahibalo nga may mga scammer nga halin sa syudad sang Bacolod nga naga-operate diri sa Capiz.
Gilayon naman ini nga gin-verify sang NBI kag nadiskubrehan nga matuod ang impormasyon kun sa diin tatlo suno diri ka grupo ang naga-operate.
Natigayon naman nga madakpan ang anom nga mga persona pinaagi sa pagpakuno-kuno sang duha ka agent sang NBI bilang mga voucher investor kag nag-pay in ang mga ini sang P2-Million kag isa ka P3-Million.
Base sa ila nga imbestigasyon apat ka adlaw na nga naga-operate ang amo nga mga persona antes ang mga ini nadakpan kun sa diin ang investment scam nga ila ginapatigayon amo ang 15 days double your money kag nahibaluan nga masobra 30 na ang naka-invest sa amo nga investment scam.
Sa karon yara na sa kustodiya sang NBI ang nagkaladakpan samtang at large ang iban sa Bacolod City.
Suno pa kay Katipunan, magapangatubang ang mga naaresto sang large scale estafa kag wala sang piyansa nga ginrekomendar ang korte sa ila kahilwayan.
