Pilason ang isa ka 66-anyos nga lola matapos mabungguan sang angkar-angkar samtang nagatabok sa kalsada sa Barangay Balucuan, Dao, Capiz.
Ang biktima amo si alyas “Ring”, residente sang nasambit nga barangay, samtang ang driver sang salakyan naman amo si alyas “Dodoy”, 55-anyos kag residente sang Barangay Dangula, Dumarao, Capiz.
Sa inisyal nga imbestigasyon nagikan sa Dao Municipal Police Station, ginpahayag nagatabok sa dalanon si “Ring” sang nabungguan siya sang nagaagi nga angkar-angkar.
Nag-angkon siya sang pilas sa nagkalain-lain nga parte sang iya lawas nga gilayon siya ginrespondehan sang Dao Emergency Response Unit kag gindala sa ospital para sa nagakaigo nga pagbulong .
Sa karon, yara na sa kustodiya sang Dao Municipal Police Station ang driver para sa nagakaigo nga disposisyon.
