ROXAS CITY – Arestado ang isa ka 67-anyos nga persona matapos nga ginaalegar naglapas sa ginapatuman nga curfew hours sa Barangay Inzo Arnaldo Village, Roxas City.
Ginkilala ang nadakpan nga si Paul Beckett sang Calipayan Street, Barangay Punta Tabuc, Roxas City.
Base sa inisyal nga imbestigasyon sang Roxas City PNP nga sakay ang nasambit nga persona sa iya nga motorsiklo kag tuyo kuntani nga magbakal sang pagkaon sa diin ginaalegar nga gin-usisa kag ginsaway pa ini sang pila ka mga barangay officials nga nahamtang sa lugar.
Sa baylo nga magsunod ini sa mga opisyales sang barangay ginapahayag nga nagbato pa ang nasambit nga persona.
Bangud diri, ginpakamaayo na lamang sang mga opisyales sang barangay nga dal-on ini sa pulisya para sa nagakaigo nga disposisyon.
Apang, sang dili madugay hinali na lamang nga nagpangayo sang medical assistance ang amo nga persona matapos nga naglain ang iya sini pamatyag.
Gilayon naman nga nagtawag ang mga pulis sa Capiz Emergency Response Team ukon CERT agud hatagan sang nagakaigo nga pagbulong ang nasambit nga persona.
