Isa ka tumalagsahon nga hitabo ang ginhimo sang pito ka mga ido sa northeastern China matapos nakit-an ini nga magkaupod nga nagalakat pauli matapos ginpahayag nakapalagyo sa mga ginapatihan dognapper nga konektado sa dog meat shop.
Sa video post sang isa ka netizen nga si Lu, ang mga ido ang ginabug-usan sang German shepherd, golden retriever, Labrador, corgi, kag Pekinese nga nagalakat sa isa ka highway sa Changchun, Jilin province.
Gin-post ni Lu ang video agud magpanawagan sa mga lokal nga otoridad nga buligan ang mga ido.
Sugod sadto, ang video nakarekord sang kapin sa 230 million views.
Bilang sabat, ang isa ka lokal nga Chinese animal rescue organization sa China ang nagpadala sang mga volunteers kag drone cameras agud masiguro ang kaluwasan sang mga ido sa ila pagpanglakaton pauli.
Suno sa isa ka volunteer, ang mga ido ang ginaalegar ginkawat sang isa ka persona nga may kaangtanan sa isa ka dog meat shop apisar nga wala pa sang ebidensya nga makapamatuod sini.
Sang Marso 19, nakumpirma nga ang tanan nga pito ka mga ido ang nakabalik nga luwas sa ila tagsa ka mga puluy-an.
Sa subong, wala pa sang kasuguan sa China nga nagadumili sa pagkaon sang mga ido, apang ang Shenzhen nangin isa sa mga una nga siyudad nga nagdumili sa pagkaon sang mga kuring kag ido sang tuig 2020.
