ROXAS CITY – Nakaaresto sa karon ang pito ka mga indibiwal sa separado nga mga presuhan sa Capiz matapos nga gindakop sang mga kapulisan bangud sa paglapas sa ginapatuman nga curfew hours sa probinsiya.
Una diri, naaresto sa banwa sang President Roxas sanday Albert Abian 36-anyos; Elmer Navarro 28-anyos kag Elwin Navarro 29-anyo nga lunsay mga residente sang Barangay Poblacion sang amo nga banwa.
Mahibaluan nga nagtuga sang kinagamo ang nasambit nga mga persona rason nga pasakaan ini sang panumbungon nga paglapas sa Disobedience and Resistance to Person in Authority.
Samtang, apat ka mga indibidwal naman ang ginpakustodiya sa Roxas City Police Station kasunod sang paglapas sa ginapatuman nga curfew hour sa siyudad sang Roxas.
Ginkilala ang mga nadakpan nga sanday Mandy Borres sang Barangay Libas; Roger Diestro 18-anyos kag Bimbo Bobong 21-anyos nga lunsay mga residente sang Barangay 8 kag Jerson Bunda 22-anyos sang Barangay Punta Tabuc sining siyudad.
Bangud diri, gilayon naman nga ginpakustodiya sa Roxas City Police Station ang nasambit nga mga persona.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
