ROXAS CITY – Ginkumpirmar sang Barangay Treasurer kag nagaserbi nga isa sa mga contact tracer sang Barangay Banica sining siyudad nga nagpositibo sa COVID-19 ang 62 anyos nga lalaki kun sa diin health care worker sa Roxas Memorial Provincial Hospital matapos ginaalegar nga nagtambong sa isa ka birthday party.
Suno kay Brgy. Treasurer Levi Diaz, ginakabig nga COVID-19 suspected case ang nasambit nga health care worker matapos ini nga naka-close contact sa isa ka COVID-19 positive.
Apang sa baylo nga mag-isolate ini mas ginpili pa sini nga magtambong sa isa ka pagtililipon.
Suno kay Diaz, Nobyembre 8 sang nagtililipon sila nga magpamilya agud magpanyaga bilang kabahin sang selebrasyon sang kaadlawan.
Gindugang pa sini nga sandig sa pagpatigayon sang contact tracing, natukiban nga una nga nagbatyag sang kalain sang pamatyag ang bayaw sini kag ang ginatudlo nga ginhalinan sang COVID-19 amo ang nasambit nga health care worker.
Mahibaluan nga siyam (9) tanan ang mga nagpositibo sa COVID-19 sa magpamilya kun sa diin ginabug-usan ini sang apat (4) nga taga Barangay Banica kag lima (5) naman diri ang nagikan sa Barangay Bolo sining syudad.
Gindugang pa sini nga ang nasambit nga mga nagpositibo sa COVID-19 ang nagapabilin sa karon sa Kabalaka Isolation Facility nga nahamtang sa Capiz Villareal Stadium.
