Ginkumpirma ni Department of the Interior and Local Government (DILG) Secretary Jonvic Remulla nga nagbiya sa Pilipinas paagi sa “backdoor” ang gambling tycoon nga si Charlie “Atong” Ang.
Wala na naghatag sang dugang nga detalye si Remulla parte sa eksakto nga petsa kag pamaagi sang pagbiya ni Ang sa pungsod bangud padayon pa ang imbestigasyon sang mga otoridad.
Wala man ginbuyagyag sang opisyal ang ulihi nga nahamtangan ni Ang samtang padayon ang pagpangusisa sa kaso.
Ginapangita si Ang may kaangtanan sa ginaalegar nga pagkidnap kag pagpatay sa ginabanta 34 ka sabungero nga nagbisita sa mga bulangan nga may kaangtanan sa iya negosyo halin 2021 tubtob 2022.
Ginpahayag sang Department of Justice (DOJ) nga ginrekomendar sini ang pagpasaka sang 26 ka kaso sang kidnapping batok kay Ang kag kapin 21 ka iban pa nga indibidwal, lakip ang 15 ka pulis, matapos magtestigo ang isa ka saksi nga ang mga biktima ang ginhaboy sa Taal Lake sa Batangas suno sa ginaalegar nga mando sang negosyante.
