Gintawag sang Ibon Foundation nga “insensitive” ang pahayag ni President Ferdinand Marcos Jr. nga indi dapat magpanic ang mga Pilipino sa padayon nga pagluya sang balor sang piso batuk sa dolyar.
Sa interview sang Bombo Radyo kay Mr. Sonny Africa, executive director sang Ibon Foundation, ginpahayag sini nga mas makahalanusbo ang mga pahayag sang mga opisyal sang gobyerno sa sini nga hitabo, ilabi na sa tunga sang pagpanghangkat sa ekonomiya nga ginapangatubang sang pungsod.
Suno kay Africa, indi direkta nga mabatyagan sang mga opisyal sang gobyerno ang epekto sang pagluya sang peso, ilabi na kon may yara sila sang assets ukon kwarta nga nadeposit sa dolyar sa luwas sang pungsod.
Magluwas sini, ang mga ordinaryo nga Pilipino ang labi nga maapektuhan sang pagluya sang piso bangud mahimo ini nga mangin kabangdanan sang pagtaas sang presyo sang imported products kag iban pa nga basic goods.
Samtang, nagpanawagan naman ang grupo sa gobyerno nga magpatuman sang konkreto nga mga tikang agud mahagan-hagan ang epekto sang pagluya sang piso sa palangabuhian sang mga pumuluyo, sa baylo nga magpahayag nga indi magpanic ang publiko.
