Ginkilala bilang top performer sa implementasyon sang Accounting and Disposition of Firearms with Expired Registration “ADFER” Program sang Philippine National Police (PNP) ang Police Regional Office 6 (PRO6), matapos makarekord sang 98% accomplishment sa Project TALA, ukon Tracking, Accounting, and Lawful Disposition of Firearms with Expired Registration, sang November 19, 2026.
Sa interview sang Bombo Radyo kay Police Major Lailyn Sencil, spokesperson sang PRO6, ang pagkilala ginhatag sa rehiyon bilang pagpasidungog sa epektibo nga pagpatuman sang programa nga nagatutok sa pagmonitor kag pag-account sang mga baril nga expired na ang registration.
Suno sa accomplishment report, naglab-ot sa 26,619 sa kabug-usan nga 27,114 ka firearms records ang na-account sang PRO6, samtang 495 na lamang ka notices ang wala pa mahatag sa mga nakarehistro nga tag-iya sang armas, samtang sa nasambit nga numero, 16,424 ka notices ang nadawat sang mga tag-iya sang baril, 192 ang nagbalibad nga magbaton, samtang 10,003 ang wala makita sa ila nakarehistro nga mga address.
Pahayag pa sang PRO6, lima ka Police Provincial Offices Aklan, Antique, Capiz, Guimaras kag Iloilo ang nagrekord sang 100% accomplishment sa ila tagsa ka accounting target. Samtang, 93% naman ang accomplishment sang Iloilo City Police Office, nga naka-account sang 6,384 sa 6,879 ka firearms records.
Dugang pa, ginpasidunggan man ang PRO6 sa pagselebrar sang Founding Anniversary sang PNP Civil Security Group bangud sa maayo nga performance sini sa pagpatuman sang ADFER Program.
Sa karon, padayon ang panawagan sang PRO6 sa mga tag-iya sang baril nga expired na ang registration nga magpakig-angot sa pinakamalapit nga police station agud maasikaso ang renewal, pagdeposito sang armas, ukon iban pa nga legal nga disposisyon suno sa nagakaigo nga proseso.











