Ginapreparahan na sang Capiz Electric Cooperative (CAPELCO) ang posible nga epekto sang El Niño sa probinsya sang Capiz, ilabi na ang posible nga pagtaas sang demand sa kuryente bangud sa mainit nga tyempo.
Sa interview sang Bombo Radyo kay Engr. Edgar Diaz, Acting General Manager sang CAPELCO, iya ginpahayag nga ginatutukan na sang kooperatiba ang mga preparasyon agud masiguro nga bastante ang suplay sang kuryente sa probinsya.
Suno kay Diaz, kinahanglan nga masiguro nga masarangan sang mga power plant nga maghatag ang nagakaigo nga suplay sang kuryente agud makasabat sa posible nga pagtaas sang demand.
Ginpahayag man sini, nga ginaseguro sang CAPELCO nga yara sa maayo nga kondisyon ang ila mga transformer kag may bastante nga stocks sang mga kagamitan nga magamit sa tion nga may kinahanglan nga kumpunihon ukon ilisan.
Dugang pa sini, nagapangayo ang CAPELCO sang kooperasyon kag paghangop sang publiko, ilabi na sang mga konsumidor, sa posible nga power interruption sa pila ka lugar sa tion sang El Niño.











