Nanawagan ang isa ka tricycle driver sa Roxas City sa national government nga ibasura ang Oil Deregulation Law, nga suno sa iya amo ang panguna nga rason sang padayon nga problema sa sektor sang transportasyon.
Ginkilala ang natungdan nga si Mr. Ian De Pedro, isa ka tricycle driver sa Roxas City.
Sa interview sang Bombo Radyo kay De Pedro, iya ginpahayag nga dako nga bulig sa ila ang ginapaabot nga pagnubo sang presyo sang gatong, apang indi ini bastante nga solusyon sa madugay na nga problema nga ginapangatubang sang mga drayber.
Suno kay De Pedro, nagagamit siya sang apat ka litro nga gasolina sa kada adlaw nga pagpasada, kag bisan magnubo ang presyo sang gatong, indi gihapon ini makahatag sang daku nga dugang sa ila kita bangud nagapabilin nga mataas ang presyo sang mga panguna nga balaklon.
Pahayag pa niya, wala man nagataas ang sweldo sang ordinaryo nga mga Pilipino, ilabi na ang mga mamumugon, samtang indi man bastante ang ayuda nga ginahatag sang gobyerno sa sektor sang transportasyon.
Dugang pa sang natungdan, wala pa siya personal nga nakabaton sang ginpromisa nga uplift ukon ayuda sang national government, bisan pa nga may mga programa na ini para sa mga transport workers.
Gin-athag man sini nga wala sila nagapanubo sang pletehan bangud nagasunod sila sa taripa nga ginapatuman sang lokal nga panguluhan sang Roxas City.
Sa karon, ginapangabay ni De Pedro sa national government nga ibasura ang Oil Deregulation Law agud mahatagan sang gahom ang gobyerno nga makontrol ang presyo sang produktong petrolyo.
Nagapanawagan man siya sa lokal nga panguluhan sang Roxas City, ilabi na kay City Mayor, nga hatagan sila sang dugang nga alibyo agud mabuligan sa ila adlaw-adlaw nga pagpangabuhi.











