-- ADVERTISEMENT --

Ginkilala sang Department of Agriculture (DA) ang Roxas City bilang isa ka Hulwaran nga Banwa sa idalom sang AgriStat Data Excellence Award bangud sa husto kag regular nga paghatag sang datos parte sa kahimtangan sang mga palayan sa syudad.

Sa interview sang Bombo Radyo kay Roxas City Agriculturist Mary Ann Baria, iya ginpahayag nga dako ang importansya sang amo nga pagkilala bangud nagapakita ini nga epektibo ang pagmonitor kag pag-report sang City Agriculture Office parte sa mga aktibidad sa pagpanguma.

Suno kay Baria, kada ika-15 kag ika-30 nga adlaw sang bulan nagasumiter ang ila opisina sang online reports sa Department of Agriculture parte sa mga aktibidad sa mga palayan, lakip na ang planting, standing crops kag harvesting.

Pahayag pa niya, kabahin sa ila mga best practices ang regular nga pagmonitor sang mga agricultural technicians sa nagkalain-lain nga barangay agod masiguro nga husto kag updated ang datos parte sa kahimtangan sang mga pananom sang mga mangunguma.

Dugang pa sang natungdan, plano man sang City Agriculture Office nga magtalana sang mga technicians sa kada barangay ukon cluster agod maghatag sang duha ka adlaw nga serbisyo sa lugar kag mapalapit pa ang bulig kag serbisyo sang gobyerno sa mga mangunguma.

-- ADVERTISEMENT --

Samtang, gin-ako man ni Baria nga isa sa ila mga ginaatubang nga kabudlayan amo ang mga kalamidad nga mahimo makapugong sa pagmonitor sa mga palayan. Apang ginabuligan man sila sang mga local farmer technicians sa pagkuha kag paghatag sang mga datos.

Sa karon, padayon nga ginapaninguhaan sang City Agriculture Office nga mapadayon ang husto kag maagap nga pag-report sang agricultural data agod makabulig sa paghimo sang mga desisyon kag programa sang Department of Agriculture para sa sektor sang pagpanguma.