ROXAS CITY, CAPIZ – Indi pabor ang Alliance of Concerned Teachers (ACT) – Western Visayas sa gin-file ni Batangas Representative Leandro Leviste nga House Bill No. 27 nga may katutyuan nga maghatag sang ₱1,000 bulan nga allowance sa mga estudyante halin Kindergarten tubtob kolehiyo.
Sa interview sang Bombo Radyo Roxas kay ACT-Western Visayas Chairperson Max Montero, iya ginpahayag nga apisar maayo ang tinutuyo sang hagna, ini ang isa ka temporayo nga solusyon nga indi sarang makahatag sang long-term nga epekto sa sektor sang edukasyon.
Gin-ako sini nga may mga estudyante nga nagakinhanglan sang financial assistance, apang ginakabig niya nga indi sustainable ang plano bangud ang ₱270 billion nga kinahanglanon kada tuig para sa bug-os nga pungsod ang magabukas sang mas dako nga isyu sa pondo sang gobyerno.
Para kay Montero, ang solusyon wala nakadepende sa paghatag sang ayuda, kundi sa pagpaayo sang sistema sang edukasyon pinaagi sa mga long-term investments. Ginatumod niya ang kakulangan sa mga classrooms, kagamitan, kag mga manunudlo nga amo ang matuod nga upang sa kalidad sang edukasyon.
Ginganyat niya ang gobyerno nga mag-focus sa mga estudyante nga wala nahatagan sang importansya kag mga yara sa at risk nga indi makatapos sang pag-eskwela, imbes maghatag sang patas nga ayuda.
Sa karon, nagapanawagan si Montero sa mga mamalidha nga indi magpadala sa mga hagna nga mamag-an kun lantawon kag madali nga ipatuman, kundi maghatag sang pagtamod sa mga reporma nga makabenepisyo ang mga kabataan.
– Interviewed by: Bombo Lynd-C Bade
